Sotuvchi bilan yozishish: chat qanday ishlaydi va nima yuborsa boʻladi

Mahsulot haqida savol boʻlsa, izoh yozib javob kutish shart emas. Donada har bir doʻkon bilan alohida chat bor: siz yozasiz, sotuvchi javob beradi, butun yozishma “Xabarlar” boʻlimida saqlanadi. Bu maqola chat qanday ishlashini va undan qanday toʻgʻri foydalanishni tushuntiradi.

Qayerdan yozish boshlanadi#

Mahsulot sahifasida va doʻkon sahifasida “Sotuvchiga yozish” tugmasi bor, buyurtma sahifasida esa “Sotuvchi bilan bogʻlanish”. Ulardan birini bosganingizda oʻsha doʻkon bilan suhbat ochiladi. Agar ilgari yozishgan boʻlsangiz, eski yozishma oʻsha yerda turadi — yangi suhbat ochilmaydi.

Barcha suhbatlar “Xabarlar” boʻlimida toʻplanadi. Har bir qatorda doʻkon nomi, oxirgi xabar va vaqti koʻrinadi. Oxirgi xabar rasm yoki mahsulot boʻlsa, roʻyxatda uning turi yoziladi — “Rasm”, “Mahsulot”, “Buyurtma” yoki “Vaucher”.

Suhbat ichida doʻkon nomiga bossangiz, “Doʻkonni koʻrish” orqali uning sahifasiga oʻtasiz. Ya’ni savol berib turib, boshqa mahsulotlarini ham koʻrib chiqsangiz boʻladi.

Chatda nima yuborish mumkin#

Oddiy matndan tashqari suhbatga yana uch narsa tushadi va ular savolni ancha aniqlashtiradi:

• Mahsulot — suhbatni mahsulot sahifasidan boshlasangiz, oʻsha mahsulot kartochkasi suhbatga oʻzi qoʻshiladi. Sotuvchi qaysi tovar haqida gap ketayotganini darrov biladi.
• Buyurtma — suhbatni buyurtma sahifasidagi “Sotuvchi bilan bogʻlanish” orqali boshlasangiz, buyurtmangiz suhbatga oʻzi biriktiriladi. Bu yetkazib berish yoki qaytarish boʻyicha savollarda ayniqsa qulay.
• Rasm — suhbat ichidagi rasm tugmasi orqali yuborasiz, masalan kelgan mahsulotning holatini koʻrsatish uchun.

Ya’ni suhbat ichida qoʻlda faqat rasm biriktiriladi: aniq mahsulot yoki buyurtma haqida soʻramoqchi boʻlsangiz, suhbatni oʻsha sahifadan boshlang.

Oʻz xabaringizda belgi turadi: bitta belgi — yuborildi, ikkita havorang belgi — oʻqildi. Sotuvchi oxirgi xabaringizni oʻqigach, uning ostida “Koʻrildi” va vaqt chiqadi. Sotuvchi ayni damda javob yozayotgan boʻlsa, xabar yozish maydoni ustida “yozmoqda…” chiqadi.

Eski xabarni topish#

Yozishma uzayib ketsa, suhbat ichida qidiruv bor. “Suhbatdan qidirish” qatoriga soʻz kiritasiz — masalan mahsulot nomi yoki “oʻlcham” — va ilova mos xabarlarni koʻrsatadi. Xabarlar kun boʻyicha ajratilgani uchun “Bugun” va “Kecha” belgilariga qarab ham tez topiladi.

Bu narsa kelishuvlarni eslab qolish uchun foydali: oʻlcham, rang yoki yetkazib berish vaqti haqida gap boʻlgan boʻlsa, u yozishmada qolgan boʻladi.

Javob qancha vaqtda keladi#

Dona sotuvchilarning chatga qanchalik tez va qanchalik koʻp javob berishini oʻlchaydi. Ya’ni tez javob berish sotuvchining oʻz manfaatida.

Shunga qaramay, javob darhol kelmasligi mumkin: sotuvchi efirda boʻlishi yoki buyurtma yigʻayotgan boʻlishi mumkin. Ayrim doʻkonlarda avtomatik javob yoki tayyor javoblar sozlangan boʻladi — birinchi xabar shundan kelishi mumkin, keyin odam yozadi.

Savolni bir marta aniq yozgan ma’qul: qaysi mahsulot, qaysi oʻlcham, qaysi shahar. Qisqa va aniq savol tezroq javob oladi.