Kivi nima va uni qanday yigʻib, xaridda ishlatish mumkin

Donada xarid qilganingizda narxning bir qismini kivi bilan qoplashingiz mumkin. Kivi — bu chegirma: uni jonli efir davomida oʻyin oʻynab yigʻasiz, keyin savatda tugmani yoqib ishlatasiz. Bu maqola kivi qayerdan kelishini, qanday hisoblanishini va qaysi holatlarda ishlamasligini tushuntiradi.

Kivi nima va nima emas#

Kivi — Dona ichidagi chegirma birligi. U pul emas: kartaga yechib boʻlmaydi, boshqa odamga oʻtkazib boʻlmaydi, naqdga almashtirib boʻlmaydi. Uning yagona vazifasi — Donadagi xaridingizni arzonlashtirish.

Ilovada kivining ayni paytdagi kursi koʻrsatiladi: ma’lum miqdordagi kivi ma’lum soʻmga teng. Balansingiz qancha soʻmlik chegirma berishini “Kivilarim” ekranida koʻrasiz — hisoblab oʻtirishingiz shart emas.

Kivini qanday yigʻasiz#

Kivi faqat jonli efirda beriladi. Sotuvchi efirga chiqqanda ekranda oʻyinlar paydo boʻladi:

• Omadli gʻildirak — efir davomida gʻildirakni aylantirasiz. Sovrinlar soni cheklangan: tugasa, oʻsha efirda boshqa chiqmaydi.
• Sovgʻa yomgʻiri — ekranda tushayotgan kivilarni raund tugagunicha ushlaysiz.
• Soʻrovnoma — sotuvchining savoliga ovoz berasiz.
• Efirni koʻrish — efirni uzoq tomosha qilsangiz, har bosqichga yetganingizda mukofot olasiz. Har bosqich uchun bir martadan.
• Ulashish — efir havolasini ulashasiz, yangi tomoshabin oʻsha havoladan kirsa, sizga kivi tushadi.

Har bir yutuq darhol hisobingizga qoʻshiladi. “Tushumlar tarixi” ekranida har bir kivi qayerdan kelgani yozib boriladi.

Kivi hisobingiz ilovadagi “Kivilarim” ekranida turadi. U yerda uchta narsa koʻrinadi: hozirgi balans, uning soʻmdagi taxminiy qiymati va yaqin orada muddati tugaydigan miqdor. Shu uch raqamga qarab keyingi xaridni rejalashtirish qulay.

Agar efirda oʻyin chiqmasa, bu xato emas — oʻyinlarni sotuvchi oʻzi yoqadi. Bir sotuvchi har efirda gʻildirak aylantiradi, boshqasi faqat soʻrovnoma qoʻyadi. Shuning uchun turli efirlarda turlicha imkoniyat boʻladi.

Xaridda qanday ishlatiladi#

Savatga oʻtganingizda “Kivilar bilan toʻlash” qatori chiqadi. Tugmani yoqsangiz, narxning bir qismi kividan yechiladi, qolganini karta yoki naqd bilan odatdagidek toʻlaysiz.

Muhim cheklov bor: kivi har bir mahsulot narxining belgilangan ulushigacha ishlatiladi. Ya’ni butun buyurtmani faqat kivi bilan yopib boʻlmaydi. Shuning uchun savatdagi raqam koʻpincha balansingizdan kichik boʻladi — u “shu savatda ishlata oladigan” miqdorni koʻrsatadi, umumiy balansni emas.

Ba’zi savatlarda esa “Bu savatda kivilarni ishlatib boʻlmaydi” deb yoziladi. Bunday holatda mahsulot yoki aksiya sharti kivi bilan birga ishlamaydi.

Muddat va qaytarish#

Kivining amal qilish muddati bor. Muddati tugashiga oz qolganda ilova sizga eslatma yuboradi va qaysi sanada qancha kivi kuyishini aytadi. Shuning uchun yigʻilgan kivini uzoq saqlashdan koʻra, yaqin xaridda ishlatgan foydaliroq.

Mahsulotni qaytarsangiz hech narsa yoʻqolmaydi: kivi kivi boʻlib, pul pul boʻlib qaytadi. Masalan, buyurtmada bir qism kivi ishlatilgan boʻlsa va siz bitta mahsulotni qaytarsangiz, oʻsha mahsulotga toʻgʻri kelgan kivi hisobingizga qayta tushadi, qolgan summa esa toʻlagan usulingizga qaytariladi.